Retounen Nan Paj Lis Lèt Yo

 

M, Trèzyèm lèt nan alfabèt lang Kreyòl la.  Abrevyasyon mo, mwen.   Mwen rele li deja = M rele li deja.

Mabouya, Yon ti bèt ki gen kat pye, long ke e ki sanble li trennen sou vant li pou mashe.  Li viv nan tou tè e nan raje tankou plenn.

Madanm, Yon fi ki gen ven ane konsa.  Yon fi ki marye avèk yon gason.  Yon fi ki posede pouvwa avèk respè.  Yon fi ki marye.

Madi, Twazyèm jou nan yon semèn e dezyèm jou travay nan yon semèn.

Madmwazèl, Yon fi ki prèke vini yon madanm; li gen anviwon kenz a ven ane konsa.  Yon fi ki pwofesè lekòl.  Yon fi ki pa janm marye nan lavi li.  Demwazèl.

Maïssade, Gade Mayisad.

Majè, Dwèt ki pi long e ki nan mitan lòt kat dwèt men yon moun.  Yon moun ki rive nan yon laj kote li kapab pran desizyon paske li konnen diferans ant byen avèk mal.

Majeste, Yon moun ki gen anpil pouvwa tankou yon wa.

Majestik, Yon moun ki gen anpil grandè tankou yon wa.  Yon moun, gwo travay yon moun ki merite anpil respè.

Majistra, Shèf yon vil nan anpil peyi.  Shak vil gen majistra pa yo.  Gen twa majistra nan shak vil nan peyi Ayiti, men shak nan yo gen plis pouvwa pase lòt la.

Majò, Yon grad nan anpil kò militè ki responsab administrasyon yon twoup.  Nenpòt moun ki gen responsablite pou pase lòd nan yon gwoup.

Majorite, Pi gwo pati a nan yon gwo kantite.  Pi plis kantite moun ki vote pou yonn nan plizyè kandida ki te patisipe nan yon eleksyon.

Mak, Yon mak mashin GMC (General Motor Company), yon konpayi mashin ameriken fè.  Yon kamyon.  Yon nan douz disip Jezi Kris yo lè li te sou tè a.  Mark.  Yon tash pou fè diferans ant plizyè bagay.

Make, Fè mak yon kote, sou yon bagay.  Eseye pou pran yon boul nan men jwè yon lòt ekip.  Anpeshe jwè yon lòt ekip ale fè gòl.  Sonje yon bagay mal yon moun fè e kontinye siveye moun sa pou wè si li ap fè menm bagay la ankò.

Makè, Yon jwè ki ap make yon lòt jwè nan yon match.  Yon moun ki make yon moun.

Makiyaj, Pwodui shimik fi avèk aktè mete nan figi yo pou shanje aparans yo.

Makiye, Mete makiyaj sou figi pou shanje yon aparans.

Makout, Konbinezon de djakout ki gen menm gwosè e ayisyen yo mete sou do bèt tankou sheval pou fè yo pote shay.  Gen gwo makout pou pote anpil shay e gen ti makout ki fèt pou mete sou do sheval notab yo.  Gade atashe.

Mal, Nenpòt bagay ki pa fèt byen ou byen jan sosyete a espere li te sipoze fèt.  Satan.

Maladi, Shanjman nan sante yon èt vivan ki anpeshe li mennen yon lavi nòmal.  Maladi bay doulè, soufrans, feblès nan kèk ògán, pati kò.

Malè, Yon move bagay ki rive san moun ki koz li a pate planifye li.

Malere, Moun nan yon klas nan yon sosyete ki travay di e ki pa kapab fè anpil kòb vit.  Moun ki pa gen anpil kòb.

Malfezan, Moun ki renmen fè bagay ki mal.

Malfezans, Aksyon yon malfesan.  Fè yon moun, ki pa konnen kijan pou li defann tèt li, mal.

Malis, Koken.  Eta yon moun ki pa janm kite tras pou moun kenbe li lè li fè yon move bagay, yon bagay mal.  Entelijan.

Malkadi, Manifestasyon yon maladi kèk moun genyen ki fè yo pèdi konesans, tranble anpil e rele pandan boush yo ap fè kim.

Malpwoprete, Tout bagay moun konsidere tankou bagay ki sal.  Nenpòt bagay sosyete a panse moun pa dwe fè devan lòt moun tankou mashe san rad nan lari.

Maltrete, Bay move tretman tankou bat yon moun pou jis li pèdi konesans, tout kouraj li e menm mouri.

Malveyan, Yon moun ki pran plezi nan fè moun ki pi fèb pase li sa ki mal.

Mamit, Yon bwat long an metal e won avèk kouvèti solid kole nan de pwent li.

Manba, Pistash ki kraze pou jis li fè labouyi.  Lè li kraze byen, li fè grès.  Bè pistash.

Manbo, Yon fi ki sèvi lwa e ki bay lwa itilize kò li lè yo bezwen kominike avèk lòt moun, fè remèd pou pitit fèy yo, e danse nan seremoni lwa tankou vodou.  Yon bòkò fi.

Manda, Yon pèmisyon sèlman yon jij kapab bay polis pou rantre andedan kay yon moun menmsi moun nan pa vle yo rantre.

Mande, Reklame yon bagay nan men moun pou kado san moun nan pate pran desizyon anvan pou bay bagay la.  Pran desizyon pou resevwa yon bagay.

Mandyan, Moun ki renmen mande e ki mande kado pou siviv nan lavi.

Mango, Fri yon pye bwa ki gen yon gwo grenn, ji, kèk fwa fil tou e ki gen menm non avèk pye bwa ki donnen li.  Gen anpil mango tankou blan, doudous, janmari, miska, grennsi, fil, fransik e latriye.

Manje, Mete yon bagay nan boush, mastike li epi vale.

Manjè, Nenpòt moun, bèt, e latriye ki manje.

Manke, Pèdi yon shans, yon benefis.  Rate.  Anvi pou wè yon moun.

Manman, Yon fi, yon femèl bèt ki fè piti.  Lanati.  Yon peyi.  Yon fi ki adopte yon timoun.

Mannivèl, Kat bransh bagay ki menm longè a sou do yon elikpotè pou ede li vole e rete anlè san li pa tonbe.  Plizyè moso plastik ou byen metal ki nan yon vantilatè e ki kreye van lè yo ap vire.

Mansh, Yon pwent, yon bransh nan yon bagay.  De tou nan yon rad kote moun rantre ponyèt yo.

Manshèt, Yon ti mansh.  Yon kouto laj, long ki fèt pou koupe gwo bagay yon ti kouto pa kapab koupe.

Mantal, Bagay ki gen rapò avèk sa ki ap pase nan tèt moun, men ki pa oblije gen pyès lyen avèk reyalite a.  Gen moun ki toujou santi yo malad, men doktè pa ap janm kapab jwenn maladi yo paske maladi moun sa yo mantal.  Yon maladi mantal kapab vini reyèl.

Mantè, Moun ki renmen e ki bay pran plezi nan bay manti.  Moun ki toujou di wi pou bagay yo te fèt pou di non.

Manti, Bagay moun di moun pou verite, men ki pa vrè. 

Manyen, Toushe yon bagay avèk men.  Toushe.  Travay yon doktè fèy lè li ap pase men li sou tout kò yon malad pou jwenn ki kote yon maladi ye pou preskri tretman pou maladi a.

Manyòk, Yon ti pye bwa kiltivatè ayisyen plante e ki bay de rasin diferan:  yonn pwès, blan, dous e yon lòt anmè.  Moun bouyi manyòk dous la e yo manje li.   Manyòk anmè a bay lanmidon avèk kasav.

Marande, Vlope yon bagay avèk kòd.  Eta yon moun ki nan yon sitiyasyon kote li pa konnen kisa pou li fè pou soti nan sitiyasyon an.

Marasa, De pitit, pou pi piti, yon manman fè e ki, pou pi piti,  gen yon fi avèk yon gason nan pitit yo.

Mare, Vlope yon kòd byen di sou kò yon moun, yon bèt, yon bagay avèk espwa moun nan, bèt la, bagay la pa ap kapab demare tèt li.

Mari, Yon gason ki marye avèk yon fi.  Manman Jezi Kris.

Mark, Yon mak mashin GMC (General Motor Company), yon konpayi mashin ameriken fè.  Yon kamyon.  Yonn nan douz disip Jezi Kris yo lè li te sou tè a.  Mak.

Maryaj, Yon desizyon yon gason avèk yon fi pran anba lalwa pou yo viv ansanm e pou yo shak pran tout responsablite pou lòt la.  Yon desizyon yon gason avèk yon fi pran devan Bondye pou yo pase tout lavi yo ansanm nan nenpòt ki kondisyon.  De bagay, de moun, de bèt ki mare ansanm.

Marye, Pran yon angajman devan lalwa e devan Bondye pou viv avèk yon madanm ou byen yon mari pandan tout lavi madanm nan ou byen mari a.  Pran yon angajman.

Mas, Twazyèm mwa nan yon ane e dezyèm mwa ki gen 31 jou nan yon ane.

Masak, Touye, ansanm, anpil moun ki pa kapab defann tèt yo.

Masakre, Touye anpil moun nan yon masak.  Gate yon bon travay yon moun te ap fè.

Masakrè, Moun ki kòz yon masak.  Moun ki masakre anpil moun ki pa gen mwayen pou defann tèt yo.

Mashandiz, Bagay yon mashann ashte pou li revann.

Mashann, Moun ki gen mashandiz pou vann.

Mashe, Yon plas kote mashann mete mashandiz yo pou yo vann e ashtè ale la pou yo ashte.  Leve pye gosh e pye dwat yonn apre lòt epi depoze li pi devan pou deplase yon kò.  Avanse nan menm direksyon fas, je ap gade.  ~ Nwa, Yon moman lè mashann ki gen yon mashandiz pwofite monte pri mashandiz la nenpòt wotè yo vle paske pa gen anpil nan mashandiz sa a e anpil moun bezwen ashte li.

Mashin, Nenpòt aparèy mekanik, elektwonik ki kapab fè yon travay tankou kraze kann, kraze mayi, woule yon kasèt, e latriye.  Yon aparèy ki sèvi pou transpòtasyon moun e ki kapab genyen kat, sis, dis, menm dizuit wou.  

Mason, Yon moun ki espesyalise nan shashe konprann espri natirèl yo pou kontwole lanati.  Yon moun ki prepare mòtye pou fè kay e ki, kèk fwa, aprann fè kay tou paske li toujou ap sib travay moun ki ap fè kay.

Masonn, Yon mòtye ayisyen fè avèk lasho e ajil pou yo boushe tou ant palisad e klisay kay.

Masonnen, Mete masonn sou yon palisad ou byen yon klisay.

Matematik, Nenpòt bagay ki gen rapò avèk syans Matematik Yo.

Matematik Yo, Plizyè syans ki etidye anpil bagay ki pa fè sans e ki eksplike relasyon ki egziste ant tout bagay sa yo.   Yon syans matematik di si A se menm avèk B, B se menm bagay avèk C, A avèk C se menm bagay la ou byen  si A=B, B=C, konsa: A=C

Matla, Pati nan yon kabann ki fè kabann nan mou pou kò moun kapab kole avèk kabann nan.

Mawon, Yon koulè ki sanble avèk shokola.  Nenpòt moun ki ap viv nan kashe.  Eta esklav ki pate vle rete nan esklavaj e ki te pati ale nan mòn kote yo konnen kolon yo pate kapab monte ale shashe yo.  Esklav sa yo te konnen desann sou plantasyon kolon yo lannwit pou touye yo, brile plantasyon yo.

Mawonaj, Eta moun ki ap viv nan kashe.  Eta esklav nan tan koloni Sen-Domeng (Ayiti) ki te konnen viv nan kashe pou atake blan gouvènè yo lannwit.

Mayi, Yon grenn jón, wouj, yon plant donnen e moun manje li.  Moun fè yon poud avèk mayi (mayi-mounlen).  Lè grenn mayi a kraze li bay yon poud ki gen de poud diferan nan li:  farin mayi a, mayi-moulen an.

Mayisad, Yon vil nan Depatman Sant la ki toupre kapital depatman an, Ensh.  Maïssade.

Mayonèz, Yon bagay ki fèt avèk jón ze, sitwon, vinèg, lwil e moun itilize pou prepare anpil manje, mete sou lòt manje pou bay yo pi bon gou.

Mazda, Yon konpayi mashin ki te konnen fè ti mashin sèlman e ki fè mwayèn mashin konnye a.

Me, Senkyèm mwa nan ane e moman nan ane a lè tout bèl flè nan tout pye bwa parèt, fleri.

Mè, Yon òganizasyon fi ki sakrifye tout lavi yo pou sèvi moun avèk Bondye san kashe aksyon yo.  Mè pa marye e yo pa fè pitit.

Medam, Plizyè fi an gwoup ou byen ki reyini ansanm.

Mèg, Eta yon moun, yon bèt anpil zo nan kò li vizib.  Shèsh.  Yon bagay ki piti, an ti kantite.

Megri, Yon bagay kantite li ap diminye, bese.  Yon moun, yon bèt ki ap vini mèg, shèsh.

Mèkredi, Jou ki nan mitan yon semèn.  Katriyèm jou nan yon semèn e twazyèm jou travay nan yon semèn.

Meksik, Yon peyi sou kontinan Amerik la, nan sid Etazini kote moun yo pale Espanyòl.  Etazini nan nò li epi Beliz avèk Gwatemala nan sid li.

Melankoli, Eta yon moun tankou yon ekriven ki pase anpil move moman nan lavi li e ki pale de tout bagay sa yo nan liv li ekri.  Ekspresyon yon ekriven ki pale de tribilasyon moun nan liv li. 

Melankolik, Travay yon ekriven kote li ap esplike mizè li, povrete li, tribilasyon li.  Eta yon bagay ki gen melankoli nan li.

Memwa, Yon kote andedan tèt moun ki enrejistre tout sa yon moun kapab sonje.  Abilite pou moun sonje konesans yo fè.  ~ Kout, Pati nan memwa moun ki kenbe enfòmasyon pou yon tan kout tankou kèk segond konsa.  Apre de moun fini rankontre epi yonn bliye non lòt la apre kèk segond, se paske moun nan te itilize memwa-kout yo pou kenbe enfòmasyon sa a.  ~ Long, Pati nan memwa moun itilize pou kenbe enfòmasyon pou yon tan long, men yo ap bliye bagay sa yo apre kèk jou, kèk semèn konsa.  Yon elèv lekòl bliye yon leson li te aprann apre kèk jou pase leson an te nan memwa long li.  ~ Pèmanan, Pati nan memwa moun ki kenbe enfòmasyon moun pa janm bliye tankou non moun nan menm, ane moun nan te fèt e latriye.

Memorize, Mete enfòmasyon nan memwa.  Itilize memwa pou sonje bagay ki pase.

Men, Dènye pwent nan de manb yon moun ki kole nan zepòl yo kote senk dwèt yo ye a.  Pati nan kò yon moun li itilize pou kenbe tout sa li bezwen.  Pran sa a.  Apre yon vigil, nan yon fraz, Men vle di:  Poze aksyon sa a e evite yon lòt aksyon.

Menm, De ou byen plis bagay ki pa gen diferans ant yo.  Men’m, Men ki nan kò kò yon moun ki ap pale.

Menmsi, Ekspresyon moun itilize pou diminye valè yon bagay, rezilta, konsekans ki kapab genyen nan yon bagay.

Mennen, Kontwole yon moun, yon bèt, yon bagay ki soti yon kote pou jis li rive yon lòt kote.

Mercedes, Yon mak mashin liksye.

Mesaj, Pawòl yon moun di yon lòt moun pou li ale di yon lòt moun ki pa te kapab tande lè premye moun nan te ap di pawòl la.  Yon mesaj kapab ekri sou papye tou.

Mesaje, Moun ki pote yon mesaj ale bay yon lòt moun.

Mesajè, Yon fi ki pote yon mesaj ale bay yon lòt moun.

Mèsi, Mo moun di moun pou montre yo renmen yon bagay yon moun fè, yon bagay moun nan bay.

Meshan, Eta yon moun, yon bèt ki toujou anvi fè lòt moun, lòt bèt bagay ki ap fè yo mal, soufri.

Mestin, Yon medikaman moun pran pou li kapab fè yo gen dyare e poupou tout manje ki pase twòp tan andedan vant yo e òganis la, kò a pa bezwen yo.

Mesye, Mo moun itilize pou montre respè devan yon gason ki pi gran pase yo.  Yon gwoup gason, plizyè gason ansanm. 

Mesye!, Mo pou montre etónman moun.

Mèt, Yon inite pou mezire distans ki pa twò long.  Yon mèt gen twa pye ventsuit, trant-nèf pous trant-sèt nan li.  Moun ki posede yon bagay, yon bèt, yon moun.

Mete, Depoze, rantre yon bagay, yon moun, yon kote.

Meteyoloji, Syans ki etidye tan avèk shanjman nan tan an.

Mètrès, Yon fi ki gen relasyon entim avèk mari yon lòt fi.  Mèt kay kote yon restavèk rete.

Mi, Eta yon fri apre li fini shanje koulè e li vini gen yon bon gou tankou gou dous.  Anpil fri vini gen koulè jón, men gen kèk lòt ki gen lòt koulè tou.  Yonn nan sèt nòt mizik yo:  do, re, mi, fa, sòl, la, si.

Miba, Aksyon yon bèt ki nouris,  fini pouse pitit li mete deyò vant li.  Fè pitit (pou bèt sèlman).

Mibalè, Yon vil nan Depatman Sant la kote  Wout Nasyonal Nimewo Twa a pase.  Mirbalais.

Microwave, Maykwowev,  Yon mo nan lang Anglè pou yon aparèy shofaj ki shofe bagay moun manje e byen vit.  Yon Microwave kapab shofe yon plat manje glase nan mwens ke twa minit.

Mikwo, Yon ti aparèy elektrik ki mete ansanm avèk yon opalè pou fè vwa moun grandi anpil pou moun ki lwen yon moun ki ap pale kapab tande moun ki ap pale a san pwoblèm.

Mikwòb, Yon kantite ti bèt moun pa kapab wè avèk je yo san yon mikwoskòp, men ki egziste tout kote sou tè a.  Anpil syantis kwè mikwòb se premye èt vivan ki te egziste sou tè a.

Mikwoskòp, Yon aparèy ki gen loup ranje nan li yon fason pou ede moun wè anpil bagay je pa kapab wè san yon aparèy

tankou mikwòb e latriye.

Mil, Yon shif en avèk twa zewo dèyè li.  1.000.  San miltipliye pa dis.  Senk-san plis senk-san.

Milat, Pitit yon kolon, yon blan avèk yon fi nwa, kèk fwa, yon esklas.  Kèk ansyen esklav nan tan Sendomeng (Ayiti) ki te benefisye libète nan men kolon yo paske yo te pitit yon kolon avèk yon fi nwa.  Yon ti gwoup ayisyen ki se desandan pitit kolon nan tan koloni Sendomeng la.

Milèt, Pitit yon femèl sheval avèk yon mal bourik.  Gen mal milèt e gen femèl milèt, men milèt pa fè pitit.

Milisyen, Yon gwoup militè yon prezidan pou-tout-tan nan peyi Ayiti te kreye pou ede li kenbe pouvwa paske li pate kapab konte sou lame peyi a pou bay gouvènman li a tout sekirite li te bezwen.  Makout.  Milisyen yo te konnen abiye avèk yon inifòm koulè ble maren.  Milisyen te kraze nan ane 1986 lè pitit prezidan ki te kreye yo a te oblije kite pouvwa a.

Militè, Plizyè òganizasyon leta nan yon peyi ki regle afè sekirite avèk pwoteksyon moun e mete lòd.  Gen òganizasyon tankou Polis ki mete lòd nan vil andedan yon peyi.  Lame ki siveye fontyè yon peyi kont envazyon lòt peyi.  Si gen lagè, se lame ki ale nan lagè.  Gen plizyè ti gwoup nan shak gwoup miltè yo.   Gwoup moun ki travay avèk leta, ki abiye avèk inifòm pou travay yo e ki toujou gen zam pou bay yo fòs pou fè travay yo.

Militon, Yon vejetab ki gen anpil dlo nan nannan li e ayisyen itilize pou fè legim, bouyon.

Miltiplikasyon, Yonn nan kat operasyon aritmetik yo.  De, se miltiplikasyon de pa en (2 X 1 = 2), e latriye.

Milya, Yon en avèk nèf zewo dèyè li.  Mil miltipliye pa yon milyon.  1.000.000.000.

Milye, Yon kantite ki gen mil (1.000) ou byen plizyè mil nan li.

Milyon, Yon en avèk sis zewo dèyè li.  1.000.000.  Mil miltipliye pa mil.

Milyonè, Yon moun ki posede yon milyon dola.

Minit, Yonn nan swasant init yo ki gen yon lè.

Minorite, Yon ti gwoup tankou mil moun konsa nan yon gwo gwoup tankou sis milyon moun konsa nan yon sosyete.  Yon gwo gwoup moun nan yon sosyete ki pa gen pyès dwa paske yon ti gwoup moun nan menm sosyete sa a kontwole e abize tout rès moun nan sosyete a.

Mirbalais, Gade Mibalè.

Mit, Yon ti ensèk ki fèt nan mayi lè grenn sa a rete fèmen twòp e pandan anpil tan andedan yon bagay tankou yon barik.  Pati blan andedan yon pen.

Mitan, Yon pwen ki divize yon bagay an de pati egal.  Yon lide imajinè pou di:  lwen andedan yon bagay tankou mitan lanmè.

Mitonnen, Frape yon bagay sou yon vejetab, yon legim pou kraze li.  Kraze bagay pou fè yon legim.

Mitrayèz, Yon zam otomatik militè itilize nan lagè pou tire sou moun pi vit.

Mitsubishi, Yon konpayi mashin Japonè ki fè mashin prèske tout gwosè.  Li fè vwati e li fè kamyon.

Mize, Mete espwa sou yon bagay.  Mete kòb nan yon jwèt kote plizyè moun mete kòb e se yon sèl ki ap gen dwa pran tout kòb la lè li genyen jwèt la.  Yon plas kote ki gen ansyen bagay moun kapab ale vizite pou konnen, wè bagay ki te pase lontan.  Yon kay kote ki gen anpil bagay moun kapab ale gade.

Mizè, Eta yon moun ki pa kapab jwenn pyès nan tout bagay yon moun bezwen pou li viv avèk satisfaksyon.  Yon moun ki pa gen yon kote pou li mize, ki pa kapab gen espwa anyen; menm yon repa nan yon jounen.

Mizik,  Rezilta travay plizyè enstriman mizikal ki ap jwe ansanm pandan yo ap sib prensip do, re, mi, fa, sòl, la, si a.

Mizikal, Nenpòt bagay ki bay yon son tankou mizik ou byen ki fè moun panse gen mizik ki ap jwe.

Mizisyen, Moun ki konnen jwe yon enstriman mizikal.  Yon pwofesyonèl ki konnen jwe mizik.

Mòd, Yon bagay tout moun ap fè nan yon epòk.  Yon fòm rad tout moun mete sou yo nan yon epòk.  Jan yon moun shwazi pou li fè yon bagay.

Mòde, Kole de ranje dan sou yon bagay epi peze de ranje dan yo sou li.

Modi, Move shans ki sib yon moun pandan tout lavi li paske li pa gen respè pou moun ki pi gran pase li.

Mòn, Kote yon moso tè leve wo.  Pati sou tè a ki pi wo pase lòt pati sou tè a.

Moniman, Yon bagay moun konstwi pou reprezante yon bagay ki te egziste nan yon moman ki pase; konsa piti yon peyi, yon zòn kapab wè, toujou sonje bagay sa a.  Yon moniman kapab reprezante yon moun tou, menm yon moun vivan.

Monitè, Yon elèv ki gen responsablite pou kenbe lòd nan yon klas lè pa gen pwofesè nan klas la.  Yon aparèy ki sanble avèk yon televizyon e ki pèmèt moun li bagay ki ap pase andedan yon òdinatè e pase òdinatè a lòd tou.

Monnen, Lajan ki fèt avèk metal tankou lajan avèk kuiv.

Monseyè, Yon shèf nan legliz katolik ki reponsab legliz nan yon depatman nan peyi Ayiti.

Monte, Soti anba pou ale anwo.  Travay yon avyon ki kòmanse vwayaje.  Pase pye sou yon sheval, yon bisiklèt, yon motosiklèt.

Montè, Moun ki monte yon bagay.  Moun ki soti anba pou ale anwo, anlè.

Montre, Mete dwèt endèks la nan direksyon yon bagay pou yon moun kapab wè li.  Mete yon bagay kote pou moun wè li.

Monwi, Yon vil sou Wout Nasyonal Nimewo En an e ki tou pre Sen-Mak, anviwon swasant kilomèt de Pòtoprens.  Mashin ki ap vwayaje soti, ale nan nò peyi a toujou kanpe Monwi pou ashte griyo, fig, e latriye.

Mòpyon, Yon ti tash blan deshay fè lè li rete sou pwèl yon moun pou anpil tan.  Li pi bon si yon moun pa kite deshay rete sou pwèl li pou plis ke 24 èdtan.

Motivasyon, Rezilta konsèy yon moun resevwa ki fè li panse li kapab fè yon bagay li pate ap janm panse li kapab fè si li pate janm resevwa konsèy sa yo.

Motosiklèt, Yon mashin ki gen de wou avèk yon motè.  Shofè yon motosiklèt shanje vitès avèk pye li e li bay gaz avèk men dwat li.

Mòtye, Yon melanj ant plizyè bagay tankou lasho, sab, siman, ajil epi dlo.

Moulen, Yon mashin peyizan ayisyen fè pou kraze kann e retire dlo ki nan nannan kann yo.  Yo fè bèf rale zèl moulen pou vire li.  Yon mashin avèk motè pou kraze pistash, mayi, pitimi.  Yon mashin ki kale diri.

Moun, Kretyen.  Yon èt vivan ki kòmanse viv sou tè a depi plizyè milye ane, ki gen de men, de pye e ki mashe sou de pye yo.  Yon moun kapab pale, refleshi, li, ekri, e viv nan sosyete.

Mouri, Eta yon èt vivan, yon moun ki sispann respire, sispann viv.

Moush, Yon ensèk ki gen zèl pou vole, ki gen sis pye e ki renmen bagay sal.  Moush kapab transpòte maladi bay moun lè li fini pran mikwòb yon kote epi vini poze sou moun, manje moun.

Moushwa, Yon moso twal pou siye figi ou byen mare tèt.  Se fi ki mare tèt yo nan sosyete ayisyen yo.

Mouton, Yon moun ki pa konnen kijan pou li defann tèt li.  Inosan.  Yon bèt nan fanmiy kabrit ki pa gen kòn.  Se premye bèt syantis rive fè nan repwodiksyon atifisyèl, yon eksperyans ki te fèt nan finisman ane 1990 yo.

Mouye, Eta yon bagay ki gen yon likid tankou dlo sou li, andedan li.

Mov, Yon koulè ki sanble avèk koulè ble ki melanje avèk koulè wouj.

Move, Fashe.  Yon moun ki gen pli nan mitan fon li, ki pa kontan e ki pa ap ri pou pyès rezon.

Mozayik, Bèl ti moso beton ki pase nan fou lè yo te ap fèt e konstriktè kay mete atè a andedan shanm yon kay.

Mwa, Yonn nan douz pati nan yon ane.  Gen sèt mwa nan yon ane ki gen tranteen jou nan yo:  Janvye, Mas, Me, Jiyè, Out, Oktòb, Desanm.  Gen yon sèl mwa, Fevriye, ki gen 28 ou byen 29 jou nan yon ane.  Gen 4 mwa ki gen trant jou:  Avril, Jyen, Septanm, Novanm.  Malgre diferans ki gen nan kantite jou nan mwa yo, shak trant jou nan yon ane se yon mwa.

Mwatye, Nenpòt nan de pati ki sou shak de bò mitan yon bagay.  Yonn nan de pati yo lè yon bagay divise an de pati egal.

Mwayen, Posiblite ki gen disponib pou itilize.  Lajan moun posede pou li depanse nan sa li vle.

Mwayèn, Yon kantite, gwosè ki ant pi gwo a e pi piti a.  Nòt yon pwofesè bay elèv nan klas li pou nivo rezilta travay elèv la.

Mwayènaj, Yon epòk ant senkyèm e kenzyèm syèk la.  Gen anviwon mil-kat-san ane depi moman sa pase.

Mwen, Yon pwonon ki ranplase moun ki ap pale a.

Mwens, Retire nan…  Absans yon kantite nan yon lòt kantite ki pi gwo, laj.  Siy sa a, -.

Myèl, Yon ti bèt ki viv an koloni e tout ti bèt sa yo se mal eksepte yonn nan yo, rèn nan.  Ti bèt sa yo fè yon nish pou ponn, kove ze yo.  Andedan nish sa li lage yon siwo ki rele myèl tou.  Siwo sa gen anpil vitamin nan li e moun renmen li.